نئی دہلی : ہندوستانی ٹیم کو حیدرآباد میں انگلینڈ کے خلاف پہلے ٹیسٹ میں شکست کا منہ دیکھنا پڑا۔ اس جیت کے بعد انگلینڈ نے 5 میچوں کی سیریز میں 1-0 کی برتری حاصل کر لی ہے۔ دوسری اننگز میں اچھی شروعات کے باوجود ٹیم انڈیا میچ ہار گئی۔ شکست کے بعد ہندوستان کو ایک اور بڑا دھچکا لگا ہے۔ رپورٹس پر یقین کیا جائے تو رویندر جڈیجہ وشاکھاپٹنم میں ہونے والے دوسرے ٹیسٹ میچ سے باہر ہو سکتے ہیں۔
کرک بز کی ایک رپورٹ کے مطابق رویندر جڈیجہ دوسرے ٹیسٹ سے باہر ہو سکتے ہیں۔ پہلے ٹیسٹ کے دوران ان کے پٹھوں میں تناؤ آگیا تھا۔ وہ کھیل کے چوتھے دن بین اسٹوکس کے ہاتھوں رن آؤٹ ہوگئے تھے۔ رپورٹ میں بتایا گیا کہ ان کی اسکیننگ رپورٹ حیدرآباد سے ممبئی بھیج دی گئی ہے۔ جس کا جائزہ پیر تک لیا جائے گا، جس کے بعد فیصلہ کیا جائے گا کہ جڈیجہ کو دوسرے میچ میں موقع ملے گا یا نہیں۔
جدیجہ کی فٹنس کے بارے میں پوچھے جانے پر ہندوستانی ٹیم کے کوچ راہل دراوڑ نے کہا کہ “ایمانداری سے کہوں تو مجھے ابھی تک فیزیو سے بات کرنے کا موقع نہیں ملا ہے۔ ایک بار جب میں واپس آؤں گا تو میں ان سے بات کروں گا اور دیکھوں گا کہ معاملہ کیا ہے۔” بتادیں کہ اگر جڈیجہ دوسرے میچ سے باہر ہوتے ہیں تو ٹیم کافی متاثر ہوگی۔ پہلے میچ میں جڈیجہ نے گیند اور بلے دونوں سے اچھی کارکردگی کا مظاہرہ کیا تھا ۔
یہ بھی پڑھئے: ہندوستان ۔ انگلینڈ ٹیسٹ کے درمیان وراٹ کوہلی کیلئے خوشخبری، آئی سی سی سے ملا بڑا تحفہ
یہ بھی پڑھئے: آسٹریلیا کے اس مشہور کرکٹر نے جم کر پی شراب، بلانی پڑی ایمبولینس، اب بورڈ کررہا جانچ
پہلی اننگز میں رویندر جڈیجہ نے 180 گیندوں پر 87 رنز بنائے تھے۔ جبکہ دوسری اننگز میں وہ 2 رنز بنانے کے بعد رن آؤٹ ہوگئے تھے۔ گیند بازی کرتے ہوئے جڈیجہ نے انگلینڈ کی پہلی اننگز میں 3 اور دوسری اننگز میں 2 وکٹیں حاصل کی تھیں۔ اگر جڈیجہ باہر ہوتے ہیں تو کلدیپ یادو کو دوسرے ٹیسٹ میں کھیلتے دیکھا جا سکتا ہے۔ ہندوستان اور انگلینڈ کے درمیان دوسرا ٹیسٹ میچ 2 فروری کو کھیلا جائے گا۔ یہ میچ وشاکھاپٹنم میں کھیلا جائے گا۔