نئی دہلی : کسی بھی میچ میں اپنی جانب سے بہترین کارکردگی دکھانے کے بعد جب ٹیم کو شکست ملتی ہے تو کھلاڑیوں کے دلوں پر کیا گزرتی ہے، اس کا ادراک کرنا کافی مشکل ہے۔ کئی بار تو کھلاڑی شکست کے غم میں چھوٹے بچوں کی طرح پھوٹ پھوٹ کر رونے لگتے ہیں۔ ورلڈ کپ 2023 کے فائنل میں آسٹریلیا کے خلاف شکست کے بعد کپتان روہت شرما اور وراٹ کوہلی ڈریسنگ روم میں رونے لگے تھے۔ افغانستان کے خلاف میچ میں پاکستان کی غیر متوقع شکست کے بعد اس وقت کے کپتان بابر اعظم کی بھی کچھ ایسی ہی حالت تھی۔ افغانستان ٹیم کے مایہ ناز بلے باز رحمان اللہ گرباز نے بتایا کہ افغان ٹیم کے ہاتھوں شکست کے بعد بابر کی آنکھوں میں آنسو آگئے تھے۔
بتادیں کہ پاکستانی ٹیم ورلڈ کپ 2023 میں سیمی فائنل تک پہنچنے میں ناکام رہی تھی اور اس خراب کارکردگی کے بعد اپنے ملک میں چوطرفہ تنقید کے بعد بابر اعظم کو کپتانی سے استعفیٰ دینے پر مجبور ہونا پڑا تھا۔ یہ پاکستانی ٹیم کی افغانستان کے خلاف ون ڈے میں پہلی شکست تھی۔ افغان ٹیم کی اس جیت کے بعد بابر اعظم نے اپنا ایک بیٹ گرباز کو تحفے میں دیا تھا۔
رحمان اللہ نے بتایا کہ اس شکست کے بعد انہیں بابر اعظم پر بڑھتے ہوئے دباؤ کا اندازہ ہوگیا تھا۔ پاکستان کے مومن شکیب سے بات چیت کرتے ہوئے اس افغان کرکٹر کا کہنا تھا کہ ‘بابر سے بیٹ دینے کی درخواست کرنے کے بعد انہیں اس پاکستانی کھلاڑی کے جذبات کا احساس ہوا تھا، میں بابر سے وابستہ اس لمحے کو کبھی نہیں بھول سکتا۔ ہم نے پاکستانی ٹیم کو شکست دی تھی اور پھر میں نے ان سے یادگار کے طور پر بیٹ مانگا تھا ۔ جب وہ بیٹ لے کر آئے تو کافی مایوس تھے۔ ایک کھلاڑی کے طور پر میں اس جذبے کو بخوبی محسوس کر سکتا ہوں۔
یہ بھی پڑھئے: پاکستانی ٹیم کے آسٹریلیا دورے کے پہلے ہی میچ میں تنازع، سی اے نے مانگی معافی
یہ بھی پڑھئے: ’وہ کیا کر رہا ہے…‘ نئے کپتان شان مسعود کے شاٹ پر بابر اعظم کے ’ردعمل‘ سے فینس حیران
گرباز نے کہا کہ میں کیمرے کے سامنے یہ بات نہیں کہنا چاہتا ہوں، لیکن میں یہ بتانا چاہتا ہوں کہ ان کی آنکھوں میں آنسو تھے اور وہ بس رونے ہی والے تھے، ہر کوئی ان کے خلاف تھا، لیکن میں بابر بھائی کو سلام کرتا ہوں۔ وہ اتنے مضبوط تھے کہ بس چلتے رہے ، انہوں نے ہمت نہیں ہاری۔ میں کہہ سکتا ہوں کہ وہ بہترین کھلاڑیوں میں سے ایک ہیں۔’
بتادیں کہ بابر کی جانب سے تحفہ کے طور پر بیٹ ملنے کے چند دن بعد گرباز نے پاکستان کے سابق کپتان کے ساتھ ایک تصویر بھی پوسٹ کی تھی۔ انہوں نے لکھا تھا: ایک حیرت انگیز کھلاڑی اور ایک آدمی کی طرف سے تحفہ ۔ ایک حقیقی جنٹلمین۔ سر اوپر رکھیں، مضبوط بنے رہئے اور چمک بکھیرتے رہئے۔