نئی دہلی : ملک کے وزیر خارجہ ایس جے شنکر نے نیوز 18 انڈیا کو ایک خصوصی انٹرویو میں کہا کہ چین نے ہندوستان کے جن علاقوں پر قبضہ کیا ہے، وہ سبھی 1960 کی دہائی میں کیا ہے۔ چین نے گزشتہ 10 سالوں میں ہندوستان کی کسی بھی زمین پر قبضہ نہیں کیا۔ لیکن کانگریس والے یہ بھرم پھیلانے کی کوشش کر رہے ہیں کہ اب یہ سب ہو رہا ہے۔ پیش ہے ان کے انٹرویو کا کچھ حصہ۔

سوال: راہل گاندھی کا کہنا ہے کہ چین ہندوستان سرحد میں آ گیا ہے۔ ہماری زمین پر قبضہ کرکے بیٹھا ہے۔ اپوزیشن کا یہ بھی کہنا ہے کہ اگر اڑی ہوا تو پاکستان پر سرجیکل اسٹرائیک ہوگئی، اگر پلوامہ ہوا تو ایئر اسٹرئیک ہوگئی، چین پر خاموشی کیوں رہی ہے؟

جے شنکر: چین پر خاموشی نہیں ہے۔ چین کے بارے میں لوگوں کو گمراہ کیا جا رہا ہے۔ کانگریس پارٹی اور راہل گاندھی کہتے ہیں کہ لداخ میں چین نے ہماری سرزمین پر ایک پل بنایا ہے۔ اگر آپ باریکی میں جائیں گے تو آپ دیکھیں گے کہ یہ پل ضرور بنایا گیا ہے۔ وہاں ایک جھیل ہے پینگونگ ۔ پینگونگ پر چین نے 1958 میں قبضہ کیا تھا۔

کانگریس کہتی ہے کہ چین اروناچل پردیش میں ایک گاؤں آباد کر رہا ہے۔ اروناچل پردیش کا ایک مقام ہے لونگجو ۔ اگر آپ پارلیمنٹ کے ریکارڈ پر نظر ڈالیں گے تو آپ کو معلوم ہوگا کہ پنڈت نہرو نے 1959 میں ہندوستان کی پارلیمنٹ میں کہا تھا کہ لونگجو پر چین نے قبضہ کرلیا ہے۔ یہ ہمارے ہاتھ سے نکل چکا ہے۔

کانگریس کے ایک ترجمان نے کہا تھا کہ چین نے وادی سنکیانگ میں کراکورم کے قریب ایک لنک روڈ بنایا ہے۔ اس لنک روڈ کے ذریعے چین سیاچن کے پاس تک آجائے گا۔ یہ علاقہ 1963 میں ہندوستان کے ہاتھوں سے نکل گیا تھا۔ وہ زمین چین کے پاس ضرور گئی لیکن یہ 1958 اور 1962 کے درمیان میں گئی تھی۔

اور ہماری کوشش ہے کہ ہم چین کے ساتھ سرحد پر کوئی معاہدہ کریں۔ اس لیے کانگریس والے جان بوجھ کر جھوٹ بولتے ہیں۔ وہ دکھانا چاہتے ہیں کہ جو کچھ بھی ہو رہا ہے، اب ہو رہا ہے۔ یہ اب نہیں ہو رہا بلکہ پہلے ہو چکا ہے۔ 1962 میں ہم بغیر تیاری کے چلے گئے۔ نہ سڑکیں تھیں، نہ انفراسٹرکچر۔ ہمارے فوجیوں تک خوراک، گولہ بارود اور ہتھیار پہنچنے کو یقینی بنانے کا کوئی نظام نہیں تھا۔

اب جو بھی انفراسٹرکچر بنایا گیا ہے، وہ پچھلے 10 سالوں میں بنایا گیا ہے۔ جب مودی جی حکومت میں آئے تھے تو چائنا بارڈر انفراسٹرکچر کا بجٹ 3500 کروڑ روپے تھا۔ اس وقت بجٹ 15000 کروڑ روپے ہے۔

سوال: اس وقت دنیا کے کئی ممالک میں انتخابات ہو رہے ہیں، کیا ہندوستان بھی وہاں مبصر بھیجے گا؟

جے شنکر: یہاں کے انتخابی عمل کو دیکھنے اور سمجھنے کے لیے الگ الگ سیاسی جماعتوں کے لوگ ہندوستان آئے ہیں۔ میرے خیال میں ان کے ارادے مثبت ہیں۔ ہم انہیں بھی خوش آمدید کہتے ہیں۔ اگلے چند دنوں میں میں خود ان سے ملوں گا۔ ہمارے انتخابات پر جو تبصرے ہو رہے ہیں وہ سیاسی جماعتوں کے لیڈروں کے نہیں بلکہ بیرون ملک بیٹھے میڈیا والوں کے ذریعہ ہورہے ہیں۔