نئی دہلی : وراٹ کوہلی کی دھماکہ خیز اننگز کی بدولت رائل چیلنجرز بنگلورو نے پنجاب کنگز کو 60 رنز سے شکست دے دی۔ اس جیت کے ساتھ ہی RCB کی پلے آف میں پہنچنے کی امیدیں ابھی زندہ ہیں۔ پنجاب کی ٹیم آئی پی ایل پلے آف کی دوڑ سے باہر ہو گئی ہے۔ پنجاب ممبئی انڈینز کے بعد پلے آف کی دوڑ سے باہر ہونے والی دوسری ٹیم بن گئی ہے۔ آر سی بی کی 12 میچوں میں یہ پانچویں جیت ہے جبکہ پنجاب کی 12 میچوں میں یہ آٹھویں شکست ہے۔ آر سی بی کے پاس ابھی دو اور میچز باقی ہیں۔ ڈو پلیسس کی ٹیم بقیہ دو میچ جیت کر 14 پوائنٹس تک پہنچ سکتی ہے اور چوتھی پوزیشن پر رہ کر دیگر ٹیموں سے مقابلہ کر سکتی ہے۔ اگر پنجاب کی ٹیم اپنے باقی دونوں میچ جیت بھی لیتی ہے تو اس کے صرف 12 پوائنٹس ہوں گے جو پلے آف کی دوڑ میں رہنے کے لیے ناکافی ہے۔
آر سی بی کی جانب سے دیے گئے 242 رنز کے ہدف کا تعاقب کرتے ہوئے پنجاب کنگز کی ٹیم 17 اوورز میں 181 رنز پر ڈھیر ہوگئی۔ پنجاب کی جانب سے ریلی روسو نے سب سے زیادہ 61 رنز بنائے۔ پنجاب کے سلامی بلے باز پربھسمرن سنگھ 6 رنز بنانے کے بعد آؤٹ ہوئے جب کہ جونی بیئرسٹو 27 رنز بناکر پویلین لوٹ گئے۔ وکٹ کیپر جیتیش شرما صرف 5 رنز بنا سکے۔ سوپنل سنگھ نے لیام لیونگسٹن کو کھاتہ بھی نہیں کھولنے دیا۔ ششانک سنگھ 37 رنز کے ذاتی سکور پر وراٹ کوہلی کے ہاتھوں رن آؤٹ ہوئے۔
اس سے قبل RCB نے بارش سے متاثرہ میچ میں وراٹ کوہلی کی 47 گیندوں میں 92 رنز کی شاندار اننگز اور رجت پاٹیدار کی طوفانی نصف سنچری کی بدولت 7 وکٹوں پر 241 رنز بنائے۔ پنجاب کنگز کے فیلڈرز نے اننگز کے دوران کئی کیچز چھوڑے، جس کی وجہ سے بیٹنگ کی دعوت ملنے کے بعد کوہلی اور پاٹیدار نے لائف لائن کا بھرپور فائدہ اٹھایا اور 32 گیندوں میں 72 رنز بنائے۔ جب کوہلی کھاتہ نہیں کھول پائے تھے اور جب 10 رنز پر تھے تو انہیں دو لائف لائنیں ملیں۔ انہوں نے ان مواقع کا بھرپور فائدہ اٹھایا اور آئی پی ایل کے اس مرحلے کی اپنی چھٹی نصف سنچری مکمل کی۔
رجت پاٹیدار کو بھی دو لائف لائنیں ملیں ۔ انہوں نے 23 گیندوں پر 55 رنز کی اننگز کے دوران چھ چھکے اور تین چوکے لگائے۔ کوہلی اور کیمرون گرین (46 رنز) نے اپنی جارحانہ بیٹنگ جاری رکھی اور 46 گیندوں میں 92 رنز جوڑے، جس سے آر سی بی کو 200 رنز سے آگے لے گئے۔ گرین نے اننگز کی آخری گیند پر کیچ آؤٹ ہونے سے قبل پانچ چوکے اور ایک چھکا لگایا۔ آر سی بی نے آخری پانچ اوور میں 77 رنز بنائے۔
