نئی دہلی : ملک کی راجدھانی دہلی کی رد ہوچکی ایکسائز پالیسی کے معاملے میں مسلسل ہائی پروفائل گرفتاریاں ہو رہی ہیں۔ سنجے سنگھ، منیش سسودیا کے بعد اب دہلی کے وزیر اعلی اروند کیجریوال کو بھی مبینہ شراب گھوٹالہ کیس میں گرفتار کیا گیا ہے۔ راؤز ایونیو کورٹ نے کیجریوال کو 28 مارچ تک ای ڈی کی حراست میں بھیج دیا ہے۔ ای ڈی سے جڑے ذرائع کا کہنا ہے کہ جانچ ایجنسی اب اروند کیجریوال اور کے کویتا کو آمنے سامنے بیٹھاکر پوچھ گچھ کرے گی تاکہ گھوٹالے کے پیچھے کی حقیقت سامنے آسکے۔
دلچسپ یہ بات ہے کہ انفورسمنٹ ڈائریکٹوریٹ کویتا اور وجے نائر کا بار بار تذکرہ کر رہا ہے اور مبینہ شراب گھوٹالہ میں اب تک کی تحقیقات کی بنیاد پر ان کا کردار اہم مانا جا رہا ہے۔ ای ڈی ذرائع کی مانیں تو اروند کیجریوال سے تفتیشی ایجنسی کی پوچھ گچھ کچھ خاص نکات پر مرکوز رہ سکتی ہے۔ اروند کیجریوال کا کویتا سے جلد آمنا سامنا کرواتے ہوئے سوالات اور جوابات کئے جائیں گے۔
اس کے علاوہ کیجریوال کا ساؤتھ لابی سے جڑے دیگر ملزمان سے بھی آمنا سامنا کرایا جا سکتا ہے۔ تفتیشی ایجنسی منی ٹریل کے ثبوت دکھا کر کیجریوال سے پوچھ گچھ کر رہی ہے۔ایسے میں ای ڈی کے کویتا کے ریمانڈ میں توسیع کا مطالبہ بھی کر سکتی ہے۔
قبل ازیں دوران تفتیش کویتا نے اروند کیجریوال کے بارے میں کچھ اہم معلومات ای ڈی کو دی ہیں۔ وجے نائر کے تعلق سے کجریوال سے کئی سوال پوچھے گئے۔ ہفتہ کو بھی پوچھ گچھ کے دوران ای ڈی وجے نائر کے تعلق سے سی ایم کیجریوال سے کئی سوالات پوچھ سکتی ہے۔
