نئی دہلی: آئی پی ایل 2021 میں اپنی تیز رفتار گیندوں سے سب کو حیران کرنے والے لاکی فرگیوسن (Lockie Ferguson) دباو میں بلے بازی کرنا بھی جانتے ہیں۔ نیوزی لینڈ کے اس تیز گیند باز نے اس کا نمونہ سپر اسمیگ لیگ میں دکھایا۔ ان کی ٹیم آکلینڈ ایسیز کو سینٹرل ڈسٹرکٹ کے خلاف آخری دو گیند پر جیت کے لئے پانچ رن کی ضرورت تھی، لیکن فرگیوسن نے میچ کو آخری گیند تک جانے ہی نہیں دیا اور اوور کی پانچویں گیند پر ہی چھکا لگاکر اپنی ٹیم کو جیت دلا دی۔ فرگیوسن سے کچھ دن پہلے سپر اسمیگ لیگ میں ٹرینٹ بولٹ نے بھی ایسا ہی کارنامہ انجام دیا تھا۔ انہوں نے آخری گیند پر چھکا لگاکر اپنی ٹیم ناردرن بریو کو کینٹربری کے خلاف شاندار جیت دلائی تھی۔
لاکی فرگیوسن (Lockie Ferguson) کے اس فاتحانہ چھکا کا ایک ویڈیو اسپارک اسپورٹ نے اپنے ٹوئٹر اکاونٹ سے شیئر کیا ہے۔ اس کے ساتھ ہی دلچسپ کیپشن دیا ہے ’لاکی فرگیوسن نے ٹھیک ٹرینٹ بولٹ جیسا کارنامہ کیا‘۔
اس میچ میں سینٹرل ڈسٹرکٹ نے پہلے بلے بازی کرتے ہوئے 20 اوور میں 5 وکٹ کے نقصان پر 168 رن بنائے۔ اس کے جواب میں آکلینڈ کی شروعات اچھی نہیں رہی۔ مارٹن گپٹل کے ساتھ اننگ کی شروعات کرنے والے جارج ورکر ایک رن بناکر آوٹ ہوگئے۔ اس کے بعد مارک چیپمین اور کول برکس بھی جلدی جلدی آوٹ ہوگئے۔
مارٹن گپٹل نے کھیلی طوفانی اننگ
مارٹن گپٹل نے رابرٹ او ڈونیل کے ساتھ اننگ کو سنبھالا۔ ایک وقت آکلینڈ کو 54 گیندوں میں 100 رن کی درکار تھی۔ مارٹن گپٹل اور او ڈونیل نے 70 رن کی پارٹنرشپ پر آکلینڈ کو میچ میں بنائے رکھا۔ او ڈونیل 34 رن بناکر آوٹ ہوگئے۔ آخری 18 گیندوں پر آکلینڈ کو 33 رن چاہئے تھے۔ مارٹن گپٹل اور بین ہارن نے یہیں سے کھیل کا پاسا پلٹ دیا اور طوفانی بلے بازی کرتے ہوئے 19ویں اوور میں ٹیم کے اسکور کو 160/6 پہنچا دیا۔ بین ہارن نے 300 کے اسٹرائیک ریٹ سے 27 رن بنائے۔
ایک گیند پہلے ہی فرگیوسن نے چھکے سے کھیل ختم کردیا
آخری دو گیند پر آکلینڈ کو پانچ رنوں کی ضرورت تھی اور اسٹرائیک پر فرگیوسن تھے۔ یہ اوور جوئے فیلڈ پھینک رہے تھے۔ انہوں نے پانچویں گیند پیر پر ڈالی اور فرگیوسن نے گیند کو سیدھے اسکوائر لیگ باونڈری کے پار پہنچا دیا۔ اس طرح آکلینڈ نے ایک گیند باقی رہتے ہی یہ میچ جیت لیا۔ فرگیوسن نے تین گیندوں میں سات رن بنائے۔ اس سے قبل فرگیوسن آئی پی ایل 2021 میں کولکاتا نائٹ رائیڈرس کی طرف سے کھیلے تھے۔ انہوں نے لیگ کے فائنل میں چنئی سپرکنگس کے خلاف 153 کلو میٹر سے زیادہ کی رفتار سے گیند پھینکی تھی۔ کولکاتا نائٹ رائیڈرس نے انہیں آئی پی ایل 2022 کے لئے ریٹین نہیں کیا۔ لیکن، لاکی فرگیوسن کے حالیہ فارم اور کارکردگی کو دیکھتے ہوئے انہیں خریدنے کے لئے آئندہ سال نیلامی میں کئی ٹیمیں بڑی بولی لگا سکتی ہیں۔
قومی، بین الاقوامی اور جموں وکشمیر کی تازہ ترین خبروں کےعلاوہ تعلیم و روزگار اور بزنس کی خبروں کے لیے نیوز18 اردو کو ٹویٹر اور فیس بک پر فالو کریں۔
