ممبئی : روڈ ٹرانسپورٹ اور ہائی ویز کے مرکزی وزیر اور بھارتیہ جنتا پارٹی (بی جے پی) کے سینئر لیڈر نتن گڈکری کی طبیعت بدھ کو اس وقت خراب ہوگئی جب وہ مہاراشٹر کے یاوتمال میں انتخابی ریلی میں خطاب کررہے تھے۔ خطاب کے دوران گڈکری کو چکر آگیا اور وہ اسٹیج پر ہی گرنے لگے۔ ذرائع اور ویجوئلز کے مطابق یاوتمال کے پُسد میں تقریر کے دوران گڈکری کو اچانک چکر آنے لگا اور وہ نیچے گر پڑے۔
ویڈیو میں کچھ لوگ گڈکری کو پکڑتے ہوئے نظر آ رہے ہیں۔ بتایا گیا ہے کہ ان کا علاج جاری ہے اور ان کی صحت مستحکم ہے۔ گڈکری ایکناتھ شندے کی قیادت والی شیو سینا سے یاوتمال-واشم لوک سبھا حلقہ سے بی جے پی-مہایوتی امیدوار راج شری پاٹل کے لیے مہم چلا رہے تھے۔
نتن گڈکری جیسے ہی تقریر کرنے اسٹیج پر پہنچے تو وہ بے ہوش ہو گئے۔ اس کے بعد وہاں موجود پارٹی کارکنوں نے ان کے چہرے پر پانی کے چھینٹے مارے اور انہیں اسٹیج سے اٹھا کر لے گئے۔ پھر انہیں طبی امداد فراہم کی گئی۔ لوک سبھا انتخابات کے دوسرے مرحلے کے دوران 26 اپریل (جمعہ) کو یاوتمال میں ووٹنگ ہونی ہے۔ یاوتمال کے ساتھ ساتھ مہاراشٹر کے بلدھانا، اکولا، امراوتی، وردھا، ہنگولی، ناندیڑ اور پربھنی میں بھی رائے دہندگان اپنے حق رائے دہی کا استعمال کریں گے۔
ریاست کے مشرقی وسطی حصے میں ودربھ میں واقع یاوتمال کو شدید گرمی کا سامنا ہے۔ محکمہ موسمیات نے 27 سے 29 اپریل تک مہاراشٹر کے کئی حصوں میں ہیٹ ویو کا الرٹ بھی جاری کیا ہے۔ نتن گڈکری خود ناگپور سے الیکشن لڑ رہے ہیں۔ وہاں ووٹنگ ہوچکی ہے۔ اب وہ اپنی پارٹی اور اتحادیوں کے لیے مختلف مقامات پر انتخابی مہم چلا رہے ہیں۔