تہران/تل ابیب : ملک شام کے دارالحکومت دمشق میں ایرانی سفارت خانے پر حملے کے بعد مشرق وسطی میں حالات بد سے بدتر ہوتے چلے گئے۔ پوری دنیا ایران کے جواب کا انتظار کر رہی تھی جو اتوار کو پورا ہو گیا۔ ایران نے اسرائیل پر 300 سے زائد ڈرونز اور میزائلوں سے فضائی حملے کیے ہیں۔ اس حملے نے پورے خطے کو مسلح فوجی ٹکراو کی کھائی میں دھکیل دیا ہے۔ ادھر اسرائیل نے لبنان میں حملہ کرکے حزب اللہ سے وابستہ تنظیم کے ٹھکانوں کو تباہ کرنے کا دعویٰ کیا ہے۔ ان سب کے درمیان ایران کے چیف آف اسٹاف میجر جنرل باقری کا بڑا بیان سامنے آیا ہے۔ انہوں نے دعویٰ کیا کہ آپریشن مکمل طور پر کامیاب رہا اور ایران اسے مزید آگے نہیں بڑھانا چاہتا ہے۔ انہوں نے اسرائیل کو وارننگ بھی دی ہے ۔ دوسری جانب اسرائیل پر حملے کے بعد ایران میں جشن منایا گیا ہے۔

ایران کے چیف آف اسٹاف میجر جنرل باقری نے کہا کہ ‘آپریشن (اسرائیل پر فضائی حملہ) کامیابی سے مکمل ہوا۔ ایران اس آپریشن کو مکمل مانتا ہے اور اسے مزید جاری رکھنے کا ارادہ نہیں رکھتا۔ لیکن اگر اسرائیل اس کے جواب میں کچھ کرتا ہے، تو ہمارا اگلا آپریشن اس سے کہیں زیادہ بڑا اور جامع ہوگا۔

ادھر ‘نیو یارک ٹائمز’ کی ایک رپورٹ میں کہا گیا ہے کہ 185 ڈرونز، 110 زمین سے زمین پر وار کرنے والی میزائلیں اور 36 کروز میزائل داغے گئے۔ حالانکہ اسرائیل کا دعویٰ ہے کہ ایران کے حملے سے ایک فوجی اڈے کو معمولی نقصان پہنچا اور اس کا زیادہ اثر نہیں ہوا۔ اسرائیل نے دعویٰ کیا ہے کہ ایران کی جانب سے 300 سے زائد ڈرون اور میزائل داغے گئے جن میں سے 99 فیصد کو مار گرایا گیا۔

دوسری جانب ایران اور اسرائیل کے درمیان فوجی ٹکراو کے پیش نظر جی 7 رکن ممالک کے درمیان اہم اجلاس ہونے جا رہا ہے۔ میڈیا رپورٹ میں اطالوی وزیراعظم کے دفتر سے متعلق ذرائع کا حوالہ دیا گیا ہے۔ ’عرب نیوز‘ کی رپورٹ کے مطابق یہ میٹنگ ویڈیو کال کے ذریعے ہوگی۔

ایران کی پارلیمنٹ میں جشن

اسرائیل پر فضائی حملے کے بعد ایران کی پارلیمنٹ میں جشن منایا گیا۔ اس کے ساتھ اسرائیل کو وارننگ بھی دی گئی۔ ایرانی میڈیا کے مطابق پارلیمنٹ کے اسپیکر (مجلس) نے کہا کہ اگر اسرائیل یا اس کے حامیوں کی جانب سے کسی قسم کا حملہ یا کسی اور قسم کی بزدلی کی گئی تو اس کا منہ توڑ جواب دیا جائے گا۔ شام کے دارالحکومت دمشق میں ایرانی سفارت خانے کے بعد پاسداران انقلاب کی جانب سے اسرائیل پر فضائی حملہ کیا گیا۔

نئی دہلی : ملک شام میں ایرانی ٹھکانوں پر اسرائیلی فضائی حملے کے بعد سے مغربی ایشیا میں کچھ بڑا ہونے کے خدشات ظاہر کئے جارہے تھے۔ اب یہ خدشہ سچ ثابت ہوگیا ہے۔ ایران نے درجنوں ڈرونز اور میزائلوں سے اسرائیل پر حملہ کردیا۔ حالانکہ اسرائیلی فوجی حکام نے صرف ایک فوجی اڈے کو معمولی نقصان پہنچنے کا دعویٰ کیا ہے۔ میڈیا رپورٹس کے مطابق ایک لڑکی زخمی ہوئی ہے۔ دوسری جانب ایک اور رپورٹ کے مطابق ایران نے 185 ڈرونز کے ذریعے اسرائیل پر حملہ کیا۔ اس کے ساتھ تہران سے زمین سے زمین پر مار کرنے والی 110 میزائلیں بھی داغی گئیں ۔ کروز میزائل فائر کرنے کی بھی بات کی جارہی ہے۔

نیویارک ٹائمز کی ایک رپورٹ کے مطابق ایران نے اسرائیل پر 185 ڈرونز سے حملہ کیا۔ اس کے علاوہ زمین سے زمین پر مار کرنے والی 110 اور 36 کروز میزائلیں بھی داغی گئیں ۔ میڈیا میں آئے ویڈیوز کو دیکھ کر ایسا لگتا ہے جیسے آتش بازی ہو رہی ہو۔ رپورٹ کے مطابق زیادہ تر میزائلیں اور ڈرون ایران سے داغی گئیں جب کہ کچھ میزائلیں عراق اور یمن سے بھی داغی گئیں۔ ایرانی حملے کی اطلاع ملتے ہی مغربی ممالک اسرائیل کی حمایت میں آگے آگئے۔ امریکی صدر جو بائیڈن نے کہا کہ ایران کی طرف سے داغی گئی تقریباً سبھیں میزائلوں اور ڈرونز کو ناکارہ بنا دیا گیا ہے۔

’نیویارک ٹائمز‘ نے اپنی رپورٹ میں دو اسرائیلی حکام کا حوالہ دیا ہے۔ ان حکام کا کہنا ہے کہ ان کے ملک کی جانب کل 331 ڈرونز اور میزائلیں داغی گئیں۔ ان میں سے 185 ڈرونز، 110 زمین سے زمین تک مار کرنے والی میزائلیں اور 36 کروز میزائلیں تھیں۔ بتادیں کہ کروز میزائلیں اپنی صلاحیت کے لحاظ سے کافی خطرناک ہوتی ہیں۔ وہ اپنے اہداف کو تباہ کرنے کی زیادہ صلاحیت رکھتی ہیں۔ اس میں جدید ترین ٹیکنالوجی کا استعمال کیا جاتا ہے۔

ہندوستان نے تشویش کا اظہار کیا

ہندوستان کے ایران اور اسرائیل دونوں کے ساتھ کافی اچھے تعلقات ہیں۔ ایسے میں ہندوستان نے تل ابیب اور تہران کے درمیان فوجی تصادم پر شدید تشویش کا اظہار کیا ہے۔ ہندوستان نے فوری طور پر محاذ آرائی بند کرنے پر زور دیا ہے۔ ہندوستان نے درخواست کی کہ دونوں ممالک تشدد اور ٹکراو کا راستہ چھوڑ کر سفارت کاری کے ذریعے اپنے مسائل کا حل تلاش کریں۔ نئی دہلی نے کہا کہ تازہ ترین پیش رفت سے خطے میں امن و سلامتی کے لیے خطرہ پیدا ہوگیا ہے۔