جے پور : جے پور دیہی کے چوموں علاقے میں ایک حیران کن معاملہ سامنے آیا ہے۔ وہاں سڑک کے کنارے کھڑی کار میں ایک نوجوان لڑکا اور لڑکی بے ہوش پڑے ہوئے پائے گئے۔ گاؤں والوں کی اطلاع پر پولیس موقع پر پہنچی اور لڑکا اور لڑکی کو اسپتال میں داخل کرایا۔ اسپتال میں ڈاکٹروں نے لڑکی کو مردہ قرار دے دیا۔ مرنے والی لڑکی کی شناخت انکیتا یادو ساکنہ ویشالی نگر، جے پور کے طور پر کی گئی ہے۔ جے پور کے رہنے والے جتن سائیں کی حالت بدستور تشویشناک ہے۔ وہ ایک پرائیویٹ اسپتال میں زیر علاج ہے۔

پولیس کے مطابق ابتدائی طور پر معاملہ محبت کا لگ رہا ہے۔ اتوار کی صبح جے پور-بیکانیر ہائی وے پر چوموں کے ساگر سٹی کے قریب ایک آلٹو کار کھڑی تھی۔ گاڑی کافی دیر تک وہیں کھڑی رہی۔ لوگوں کو اس بارے میں کچھ شکوک و شبہات ہوئے۔ وہاں جاکر گاڑی کا دروازہ کھولا تو وہ ہکا بکا رہ گئے۔ گاڑی کے اندر ایک نوجوان لڑکا اور ایک لڑکی بے ہوش پڑے تھے۔ یہ دیکھ کر وہاں سنسنی پھیل گئی۔ لوگوں نے فوری طور پر پولیس کو اس کی اطلاع دی۔

مقامی لوگوں کی اطلاع پر پولیس موقع پر پہنچی اور جائے وقوعہ کا معائنہ کیا۔ بعد ازاں دونوں کو مقامی اسپتال لے جایا گیا۔ جس کے بعد پولیس نے ایف ایس ایل ٹیم کو موقع پر بلایا۔ ٹیم نے جائے وقوعہ سے نمونے اکٹھے کر لیے ہیں۔ ابتدائی تفتیش سے معلوم ہوا ہے کہ نوجوان لڑکااور لڑکی نے زہریلی چیز کھا کر خودکشی کی ہے۔

پولیس نے مرنے والی لڑکی کے ورثاء کو اطلاع دیدی ہے اور لاش کو مردہ خانہ میں رکھوا دی ہے۔ فی الحال خودکشی کی وجوہات سامنے نہیں آسکی ہیں۔ یہ معلوم نہیں ہے کہ یہ لوگ کب اور کہاں سے آئے تھے۔ پولیس تمام پہلوؤں کی بنیاد پر پورے معاملے کی سنجیدگی سے تفتیش میں مصروف ہے۔ یہ معاملہ مقامی سطح پر موضوع بحث بن گیا ہے۔