Tag Archives: One Nation One Election

شمالی ہندوستان, وطن نامہ

ون نیشن۔ون الیکشن پرحکومت کابڑااقدام، رام ناتھ کووندکمیٹی نے صدرجمہوریہ کو سونپی رپورٹ، جانئے کیاہیں سفارشات

نئی دہلی: لوک سبھا انتخابات سے پہلے ‘ون نیشن، ون الیکشن’ پر ایک بڑا اپ ڈیٹ سامنے آیا ہے۔ہندوستان کے سابق صدر جمہوریہ رام ناتھ کووند کی سربراہی میں ون نیشن ۔ ون الیکشن کے انعقاد کے لیے بنائی گئی اعلیٰ سطحی کمیٹی نے راشٹرپتی بھون میں صدر دروپدی مرمو سے ملاقات کی اور اپنی رپورٹ پیش کی۔ اس دوران مرکزی وزیر داخلہ امت شاہ بھی موجود تھے۔

رام ناتھ کووند پینل کی یہ رپورٹ کل 18,626 صفحات پر مشتمل ہے۔ بتایا گیا کہ اعلیٰ سطحی کمیٹی نے وسیع بحث، اسٹیک ہولڈرز اور ماہرین سے مشاورت اور 191 دنوں تک مسلسل کام کے بعد یہ رپورٹ تیار کی ہے جسے آج صدر جمہوریہ ہند کو پیش کر دیا گیا ہے۔ خیال کیا جا رہا ہے کہ 2029 میں پورے ملک میں تمام ریاستی اسمبلیوں سمیت لوک سبھا انتخابات ایک ہی وقت کرانے کی سفارش کی گئی ہے۔

 

گزشتہ ستمبر میں تشکیل دی گئی کمیٹی کو موجودہ آئینی فریم ورک کو ذہن میں رکھتے ہوئے لوک سبھا، ریاستی اسمبلیوں، میونسپلٹیوں اور پنچایتوں کے بیک وقت انتخابات کے انعقاد کے امکانات تلاش کرنے اور سفارشات دینے کا کام سونپا گیا تھا۔ سابق صدر جمہوریہ رام ناتھ کووند کی سربراہی والی اس کمیٹی میں وزیر داخلہ امت شاہ، راجیہ سبھا میں اپوزیشن کے سابق لیڈر غلام نبی آزاد، مالیاتی کمیشن کے سابق چیئرمین این کےسنگھ شامل ہیں۔ ، لوک سبھا کے سابق جنرل سکریٹری سبھاش کشیپ اور سینئر ایڈوکیٹ ہریش سالوے بھی شامل ہیں۔

کمیٹی نے اپنی رپورٹ میں کیا کہا؟

1. ابتدا میں ہر دس سال بعد دو انتخابات ہوتے تھے۔ اب ہر سال کئی انتخابات ہو رہے ہیں۔ اس سے حکومت، کاروبار، کارکنوں، عدالتوں، سیاسی جماعتوں، انتخابی امیدواروں اور سول سوسائٹی پر بہت بڑا بوجھ پڑتا ہے۔

2. اس لیے کمیٹی سفارش کرتی ہے کہ حکومت کو بیک وقت انتخابات کے سلسلے کو بحال کرنے کے لیے قانونی طور پر ایک قابل عمل طریقہ کار تیار کرنا چاہیے۔

3. کمیٹی سفارش کرتی ہے کہ پہلے مرحلے میں لوک سبھا اور ریاستی اسمبلیوں کے انتخابات ایک ساتھ کرائے جائیں۔ دوسرے مرحلے میں بلدیات اور پنچایتوں کے انتخابات لوک سبھا اور ریاستی قانون ساز اسمبلیوں کے ساتھ مل کر کرائے جائیں گے۔

4. اس طرح کہ بلدیات اور پنچایتوں کے انتخابات لوک سبھا اور ریاستی اسمبلیوں کے انتخابات کے 100 دنوں کے اندر کرائے جائیں۔

5. لوک سبھا اور ریاستی قانون ساز اسمبلیوں کے بیک وقت انتخابات کرانے کے مقصد کے لیے، کمیٹی سفارش کرتی ہے کہ صدر جمہوریہ ہند، نوٹیفکیشن کے ذریعے، جنرل اسمبلی کے بعد لوک سبھا کے پہلے اجلاس کی تاریخ جاری کریں۔ الیکشن کمیشن اس دفعہ کی دفعات کو نافذ کرے گا اور نوٹیفکیشن کی تاریخ کو مقررہ تاریخ کہا جائے گا۔

6. کمیٹی انتخابات کرانے کے لیے آرٹیکل 324A کو استعمال کرنے کی سفارش کرتی ہے۔

7. کمیٹی سفارش کرتی ہے کہ معلق ایوان، تحریک عدم اعتماد یا ایسے کسی واقعے کی صورت میں نئے ایوان کی تشکیل کے لیے نئے انتخابات کرائے جا سکتے ہیں۔

8. جہاں لوک سبھا کے لیے نئے انتخابات کرائے جاتے ہیں، لوک سبھا کی میعاد لوک سبھا کی مکمل میعاد سے فوراً پہلے کی بقیہ مدت کے لیے ہوگی اور اس میعاد کی ختم ہونے پر اسے تحلیل کیاجاسکتاہے۔

لوک سبھا میں کانگریس لیڈر ادھیر رنجن چودھری کو بھی کمیٹی کا رکن بنایا گیا تھا لیکن انہوں نے کمیٹی کو مکمل دھوکہ قرار دیتے ہوئے اس میں شامل ہونے سے انکار کردیاتھا۔ وزیر قانون ارجن رام میگھوال کمیٹی کے خصوصی مدعو رکن ہیں۔

شمالی ہندوستان, وطن نامہ

آسان نہیں ’ون نیشن ، ون الیکشن‘ کی راہ، الیکشن کمیشن نے بتایا: کتنے کروڑ روپے کی ہوگی ضرورت

نئی دہلی : الیکشن کمیشن نے کہا ہے کہ لوک سبھا اور قانون ساز اسمبلیوں کے بیک وقت انتخابات کرائے جانے کی صورت میں نئی ​​’الیکٹرانک ووٹنگ مشین’ (ای وی ایم) خریدنے کے لئے ہر 15 سال بعد تقریباً 10،000 کروڑ روپے کی ضرورت پڑے گی۔ کمیشن نے حکومت کو بھیجے گئے ایک خط میں کہا کہ ای وی ایم کے استعمال کی مدت 15 سال ہے اور اگر ‘ایک ساتھ انتخابات’ کرائے جاتے ہیں تو مشینوں کا ایک سیٹ ان کے استعمال کی اس مدت میں تین بار انتخابات کرانے کے لئے ہی استعمال کیا جا سکتا ہے۔

ایک اندازے کے مطابق اس سال لوک سبھا انتخابات کے لئے ملک بھر میں کل 11.80 لاکھ پولنگ اسٹیشنوں کی ضرورت ہوگی۔ جب لوک سبھا اور قانون ساز اسمبلیوں کے انتخابات ایک ساتھ ہوں گے تو ہر پولنگ اسٹیشن پر ای وی ایم کے دو سیٹوں کی ضرورت ہوگی – ایک لوک سبھا سیٹ کے لئے اور دوسرا اسمبلی سیٹ کے لیے۔ حکومت کو بھیجے گئے خط میں کمیشن نے ماضی کے تجربات کی بنیاد پر کہا ہے کہ ووٹنگ کے دن پر خراب یونٹوں کو بدلنے کیلئے کچھ فیصد ‘کنٹرول یونٹ’ (CUs) ‘بیلٹ یونٹ’ (BUs) اور ‘ووٹر- ویریفئیبل پیپر آڈٹ ٹریل’ (VVPAT) مشینوں کی ضرورت ہوتی ہے ۔

اس سلسلے میں ایک ای وی ایم کے ساتھ کم از کم ایک بی یو، ایک سی یو اور ایک وی وی پی اے ٹی مشین کی ضرورت ہوتی ہے۔ کمیشن نے گزشتہ سال فروری میں وزارت قانون کو لکھے اپنے خط میں کہا تھا کہ مختلف پہلوؤں کو ذہن میں رکھتے ہوئے بیک وقت ووٹنگ کے لئے ضروری کم از کم ای وی ایم اور وی وی پی اے ٹی کیلئے 46,75,100 بی یو، 33,63,300 سی یو اور 36,62,600 وی وی پی اے ٹی ہونا چاہئے ۔

یہ بھی پڑھئے: میانمار سے متصل سرحد کو لے کر امت شاہ کا بڑا اعلان، بند ہوگی بلا روک ٹوک آمدورفت

یہ بھی پڑھئے: گیانواپی کیس: وضو خانہ کی صفائی مکمل، مسلم فریق کو سونپی گئی پانی میں ملی خاص چیز

پچھلے سال کے آغاز میں ای وی ایم کی عبوری قیمت 7،900 روپے فی بی یو، 9،800 روپے فی سی یو اور وی وی پی اے ٹی 16،000 روپے فی یونٹ تھی۔ کمیشن بیک وقت ووٹنگ پر وزارت قانون کی طرف سے بھیجے گئے سوالنامے کا جواب دے رہا تھا۔ الیکشن کمیشن نے اضافی پولنگ اہلکاروں اور سیکورٹی اہلکاروں، ای وی ایم کے لیے اسٹوریج کی سہولیات میں اضافہ اور مزید گاڑیوں کی ضرورت پر بھی زور دیا ۔

کمیشن نے کہا کہ نئی مشینوں کی تیاری، اسٹوریج کی سہولیات میں اضافہ اور لاجسٹکس سے متعلق دیگر مسائل کو مدنظر رکھتے ہوئے پہلی بار 2029 میں ہی بیک وقت انتخابات کرائے جا سکتے ہیں۔ ساتھ ہی لوک سبھا اور ریاستی اسمبلیوں کے بیک وقت انتخابات کرانے کے لئے آئین کے پانچ آرٹیکلز میں ترمیم کی ضرورت ہوگی۔ خط میں یہ بھی کہا گیا ہے کہ دل بدل کی بنیاد پر نااہلی سے متعلق آئین کے 10ویں شیڈول میں بھی ضروری تبدیلیوں کی ضرورت ہوگی ۔

No Category, شمالی ہندوستان, وطن نامہ

ڈاکٹر قاسم رسول الیاس نے ون نیشن ون الیکشن کی مخالفت کی، بتائی متعدد وجوہات

نئی دہلی: ویلفیئر پارٹی اف انڈیا کے صدر اور مسلم پرسنل لا بورڈ کے رکن ڈاکٹر قاسم رسول الیاس نے ون نیشن ون الیکشن کی مخالفت کی ہے اور اعلی سطحی کمیٹی کو ایک ڈرافٹ بھیج کر کئی دلیلیں دی ہیں ۔ تفصیلات کے مطابق ویلفیئر پارٹی آف انڈیا نے پالیسی مداخلت اور شراکتی جمہوریت کے بطور ” ایک ملک ایک الیکشن  (One Nation One Election) کے تعلق سے اعلیٰ سطحی کمیٹی کو اپنی سفارشات بھیجی ہیں، جس میں اس نے اس تصور کی سختی سے مخالفت کی گئی۔ پارٹی  کے قومی صدر ڈاکٹر سید قاسم رسول  الیاس نے انتخابات کی موجودہ شکل کو بدل کر  ’ون نیشن ون الیکشن‘  کی تجویز  پر کہا  ”ہم ہرگز بھی ناقص جمہوریت کے علاج کے نام پر  بیماری کو ناسور نہیں  بننے دیں گے۔” انہوں مخالفت کی متعدد  وجوہات پر روشنی  ڈالی ہے ۔

انتہائی مشکل اور دشوار گذار کام

”ایک ملک ایک انتخاب” ایک چیلنج ہے، کیونکہ نفاذ کے لیے موجودہ قانونی و انتظامی ڈھانچے میں  غیر معمولی تبدیلیوں کی ضرورت ہوگی تاکہ پارلیمنٹ، ریاستی قانون ساز اسمبلیوں، میونسپلٹیوں اور پنچایتوں کے بیک وقت انتخابات کرائے جا سکیں۔ اس کے لیے ملک کے آئین، عوامی نمائندگی ایکٹ 1950،  عوامی نمائندگی ایکٹ 1951، مزید ان کے تحت بنائے گئے قوانین کی 50 فیصد ریاستی اسمبلیوں سے توثیق کی ضرورت ہوگی-

عدم یکسانیت اور غیر مساوی مقابلہ

اگر ”ون نیشن ون الیکشن” کو نافذ کیا گیا تو علاقائی اور چھوٹی پارٹیاں اپنے مقامی مسائل کو مضبوطی سے نہیں اٹھا سکیں گی کیونکہ قومی مسائل ان پر حاوی ہوجائیں گے۔ اس غیر مساوی مقابلے میں وہ انتخابی اخراجات اور انتخابی حکمت عملی کے حوالے سے بھی قومی جماعتوں کا مقابلہ نہیں کر پائیں گے۔

یہ ووٹرز کو متاثر کرے گا

IDFC انسٹی ٹیوٹ کی طرف سے کئے گئے ایک مطالعہ کے مطابق، اگر انتخاب ایک ملک ایک الیکشن کے فارمولہ کے تحت ہوں گے تو 77 فیصد اس بات کا امکان ہے کہ ووٹر ریاستی اسمبلی اور لوک سبھا میں ایک ہی جیتنے والی سیاسی پارٹی یا اتحاد کو منتخب کریں گے،” تاہم، اگر انتخابات الگ الگ چھ ماہ کے وقفے پر  ہوں گے  تو  صرف 61 فیصد ووٹرز اسی پارٹی کو منتخب کریں گے۔ ہمیں خدشہ ہے کہ یہ ساری مشق پارلیمانی جمہوریت کو صدارتی نظام میں تبدیل کر نے کے لئے  کی جا رہی ہے۔

کوئی جوابدہی نہیں

”ایک ملک ایک انتخاب” میں سب سے بڑی تشویش یہ ہے کہ  حکومتوں کو شہریوں کے سامنے مستقل طور پر جوابدہ نہیں بنایا  جاسکے گا۔ جمہوری انتظامات جیسے کہ ریفرنڈم، اقدامات اور نمائندوں کو واپس بلانے کے میکانزم کی موجودگی اور مرکز  یا ریاستی سطح پر باقاعدہ انتخابات اس بات کو یقینی بناتے ہیں کہ سیاسی جماعتیں مستقل بنیادوں پر عوام کے سامنے جوابدہ ہوں۔ یہاں تک کہ ایک ضمنی انتخاب بھی حکومتوں کو ووٹروں کی مرضی کے مطابق  اپنا راستہ درست کرنے پر آمادہ کر سکتا ہے۔”ون نیشن ون الیکشن“ سے نہ صرف حکومت کے احتساب میں کمی آئے گی بلکہ سیاست بھی محدود چیک اینڈ بیلنس کی وجہ سے آمرانہ قوتوں کو  غلبہ  حاصل ہو جائے گا۔

یہ بھی پڑھئے: کیا رام مندر کی پران پرتشٹھا کے بعد جائیں گے ایودھیا؟ راہل گاندھی نے دیا یہ جواب

یہ بھی پڑھئے: متھراشاہی عیدگاہ مسجدتنازعہ : سروے کے لیے کمشنر کی تقرری پرسپریم کورٹ نے لگائی روک

غیر عملی نقطہ نظر

”ایک ملک ایک انتخاب” کے نظریہ میں  یکسانیت و یک رنگی پوشیدہ ہے، جب کہ ہمارے سماج میں  تنوع ہے۔ یہ تنوع ایک حقیقت ہے، جسے نظر انداز نہیں کیا جا سکتا- مختلف خطوں اور علاقوں کے مخصوص مسائل ہوتے ہیں جن پر انفرادی توجہ کی ضرورت ہوتی ہے- متنوع مسائل سے بے گانگی ریاستوں کی سیاست کو بھی متاثر کرے گی، اس میں انتخابی شیڈول بھی شامل ہے۔ لہذا  ‘ایک ہی سائز ہ سب کے لئے مناسب ہے  نقطہ نظر اس تنوع کے خلاف ہے اور سیاسی ردعمل کا باعث بن سکتا ہے۔