نئی دہلی: ہندوستانی کرکٹ ٹیم کے سابق کپتان ویراٹ کوہلی نے انگلینڈ کے خلاف پہلے دو ٹیسٹ میچوں سے اپنا نام واپس لینے پر سب حیران رہ گئے۔ اس کے بعد لوگوں نے بہت سی قیاس آرائیاں کیں۔ کسی نے بتایا کہ ویراٹ کی والدہ کی طبیعت ٹھیک نہیں ہے تو کسی نے بتایا کہ ان کی اہلیہ انوشکا شرما حاملہ ہیں۔ تاہم ویراٹ نے انگلینڈ کے خلاف دو ٹیسٹ میچ نہ کھیلنے کا فیصلہ کیوں کیا اس کا انکشاف ہوا ہے۔ ویراٹ کے خاص دوست اے بی ڈویلیئرز نے اس راز سے پردہ اٹھایا ہے۔
جنوبی افریقہ کے سابق کرکٹر اے بی ڈویلیئرز نے اپنے یوٹیوب چینل پر کہا ہے کہ ویراٹ کوہلی دوسری بار باپ بننے جا رہے ہیں اس لیے وہ اپنی فیملی کے ساتھ وقت گزار رہے ہیں۔ اس سے قبل سوشل میڈیا پر یہ افواہ پھیلائی گئی تھی کہ ویراٹ کوہل کی والدہ کی طبیعت ناساز ہے اس لیے انہوں نے کرکٹ سے بریک لے لی ہے۔ ویراٹ کوہلی کے بڑے بھائی وکاس کوہلی نے حال ہی میں سوشل میڈیا پر ایک پوسٹ کرکے ان خبروں کی تردید کی تھی کہ ان کی والدہ سروج کوہلی بیمار ہیں۔ وکاس نے میڈیا سے درخواست کی تھی کہ وہ ایسی جعلی خبریں نہ پھیلائیں۔
ویراٹ کوہلی اور اے بی ڈی ویلیئرز کئی سالوں سے آئی پی ایل میں آر سی بی فرنچائز کے لیے ایک ساتھ کھیل چکے ہیں۔ اب ڈی ویلیئرز نے اس خبر کی تصدیق کی ہے کہ ویراٹ اور انوشکا شرما دوسری بار والدین بننے جا رہے ہیں۔ اس سے قبل گزشتہ سال بھی ویراٹ نے جنوبی افریقہ کا دورہ درمیان میں ہی چھوڑ دیا تھا اور کچھ دنوں کے لیے ہندوستان واپس آئے تھے۔ ڈی ویلیئرز نے کہا، ‘ہاں، وہ دوسرے بچے کی آمد کی تیاری کر رہے ہیں اور اسی لیے ویراٹ اپنا سارا وقت اپنے خاندان کے لیے وقف کر رہے ہیں۔’
ویرات- انوشکا کی ایک بیٹی ہے۔اےبی ڈی ویلیئرز نے یہ بھی کہا کہ ویراٹ تیسرے ٹیسٹ میچ کے لیے ٹیم کو جوائن کریں گے یا نہیں، اس بارے میں ابھی کچھ نہیں کہا جا سکتا۔ تاہم اس سے پہلے یہ کہا جا رہا تھا کہ ویراٹ تیسرے ٹیسٹ میچ سےپہلے ٹیم کو جوائن کر لیں گے۔ ہندوستان اور انگلینڈ کے درمیان تیسرا ٹیسٹ میچ 15 فروری سے راجکوٹ میں کھیلا جائے گا۔ ویراٹ اور انوشکا شرما کی شادی 2017 میں ہوئی تھی۔ ان دونوں کی ایک تین سال کی بیٹی ہے جس کا نام وامیکا ہے۔