گملا : لوک سبھا انتخابات کے سلسلے میں جھارکھنڈ کے گملا ضلع میں انتخابی ریلی سے خطاب کرتے ہوئے وزیر اعظم نریندر مودی نے کہا کہ میدان میں جتنے لوگ ہیں اس سے زیادہ تو باہر ہیں۔ ابھی سینکڑوں لوگ راستے میں ہوں گے، جو لوگ دھوپ میں بیٹھے ہیں، ان سے معافی مانگتا ہوں، وہ تپسیا کر رہے ہیں۔ وزیراعظم نریندر مودی نے کہا کہ مجھے بھگوان برسا منڈا کے گاؤں جانے کا شرف حاصل ہوا۔ بھگوان برسا منڈا کی جائے پیدائش کی مٹی کو ماتھے پر تلک لگا کر میں نے فخر محسوس کیا۔ مجھے ہر چیلنج میں بھگوان برسا منڈا سے تحریک ملتی ہے۔

وزیراعظم مودی نے کہا کہ انڈیا ایلائنس کے لوگ ہر طرح کی باتیں پھیلاتے رہتے ہیں کہ مودی آئے تو ریزرویشن ختم کردیں گے۔ میں 10 سال سے فخر سے حکومت چلا رہا ہوں۔ سچ تو یہ ہے کہ مودی نے ان کے چہروں سے نقاب اتار دیا ہے۔ کانگریس پولرائزیشن کرتی ہے۔ کانگریس کو مسلم ووٹ بینک دکھائی دیتا ہے۔ بی جے پی سب کا ساتھ سب کا وکاس کی بات کرتی ہے۔ کانگریس کو تو یہ سب کرنا ہی نہیں ۔

وزیراعظم مودی نے کہا کہ جب ایس سی ایس ٹی او بی سی کو ریزرویشن ملا ہے تو اس میں چوری کا کھیل چل رہا ہے۔ جب آئین بابا صاحب نے بنایا تھا تو صاف کہہ دیا تھا کہ مذہب کی بنیاد پر کوئی ریزرویشن نہیں ہوگا۔ کانگریس کے لوگ ریزرویشن میں ہیرا پھیری کرکے مسلمانوں کو دینا چاہتے ہیں، لیکن، جب تک مودی زندہ ہیں، میں ریزرویشن میں رتی بھر بھی ہیر پھیر نہیں ہونے دوں گا۔

لوہردگا کے امیدوار سمیر اوراوں کے حق میں مہم چلانے گملا پہنچنے والے وزیر اعظم نریندر مودی نے کہا کہ کانگریس اور انڈیا ایلائنس کے ارکان کہہ رہے ہیں کہ اس الیکشن میں کیا ہوگا۔ میں نے انٹرنیٹ نیٹ ورک کو ہر گاؤں تک پھیلا دیا ہے۔ کانگریس والے کہتے ہیں اس کا کیا فائدہ؟ اس غریب کے بیٹے مودی کو ہر گاؤں کے لوگوں کی فکر ہے۔

انہوں نے کہا کہ جب منموہن سنگھ وزیر اعظم تھے تو سونیا گاندھی نے کئی اسکیمیں روک دی تھیں۔ گاؤں کے غریب کا بیٹا، کوئی بھوکا نہ رہے، اسی لیے میں نے مفت میں اناج دینا شروع کیا۔ مفت اناج فراہم کرنے کی ضمانت دے رکھی ہے۔